Oa moi Oans
Auf d'Volksschui bin i ganga und aufs Gymnasium
Goethe hob i glesn unds Evangelium
Doch koana hot ma predigt wos mir so ois passiert
Wenn i erst aus da Schui bin, na dös hob i net studiert!
Oa moi oans is oans, dös hob i glernt
Unds ABC und Wurzlziagn!
Doch hob is Gfui, i woas net vui
Ja gscheider war, i gangert nu amoi in d'Schui
I zoi für an Gebrauchtwogn fünftausend in bar
Und da Verkäufer sogt zu mir: "Der Wogn fahrt wunderbar!"
Doch wiar i dann davofahr, Leit dös is koa Schmarrn!
Der deire Wogn is koane zehn Kilometer gfahrn!
Oa moi oans is oans, dös hob i glernt
Unds ABC und Wurzlziagn!
Doch hob is Gfui, i woas net vui
Ja gscheider war, i gangert nu amoi in d'Schui
I hob soiche Schmerzn, dös muaß da Blinddarm sei
Drum lieferns mi so schnell wias geht in d'Poliklinik ei
Doch wiar i wieder aufwach, Leit wos sig i is passiert!
Do hams ma außerm Blinddarm ziemlich ois wegoperiert!
Oa moi oans is oans, dös hob i glernt
Unds ABC und Wurzlziagn!
Doch hob is Gfui, i woas net vui
Ja gscheider war, i gangert nu amoi in d'Schui
Da Sommerauer predigt übers fünfte Gebot:
"Du soist auf neamands schiaßn, sonst is der vielleicht tot!"
Doch jetz kriag i a Schreibn, i muaß zum Militär
Damit is erst moi richtig lern, as Schiaßn mitm Gwehr!
Oa moi oans is oans, dös hob i glernt
Unds ABC und Wurzlziagn!
Doch hob is Gfui, i woas net vui
Ja gscheider war, i gangert nu amoi in d'Schui