Istanbul
Die jroosse Wiss em Hanwald
Hück esse widder janz besonders jröön
Dä Caddie kennt se janz jenau
Un och ding dritte Frau ess jung un schön
Hück litt nix Besondres ahn
Bess op dä lästije Friseurtermin
Un dann hück Ohvend noch die Modenschau
Obwohl, do willste ei'ntlich janit hin
Doch wat mäht mer nit all
Wemmer endlich och dozojehührt
Denn mer will op keine Fall
Dat mer dä Status widder flöck verliert
Mer muß sing Connections hann
Un zosinn, dat do nix verbrennt
Met Klüngel hätt dat nix zo dunn
Doch besser ess et, wemmer einer kennt
Ich sinn dich noch em CBGB's-T-Shirt
Un der völlig fäädije Ledderbozz
Die Telecaster un dä Twin-Reverb
Woor alles, wat du broots
Wenn einer Purist woor, dann du
Die Stones wooren ding Religion
Für einer, dä ne Kompromiß maat
Hatts du nix als Spott un Hohn
Jetz luhrste Moondaachs durch die Airplay Charts
Un mähß dich schlau, wat momentan joot läuf
Wat sich dä weichjekochte Konsument
Neuerdings su käuf
Dann programmierste dä Computer
Un dä Krempel weed analysiert
Un uss dä Quersumm vun dämm janze Driss
Dä nächste Hit-Klon konstruiert
Bess du jetz do, wo du hinwollts
Dä dä du sinn wollts?
Mäht dich dinge Ausverkauf
Womöglich sujar stolz?
Wämm häss du ding Seel verkauf
Un wat joov et dofür?
Belüsch doch wä du wills
Verzäll et bloß nit mir
Janz selden kütt et vüür
Dat du des naahx huh en der Himmel luhrs
Un do dieselve Stääne siehs
Wie domohls övver Istanbul
Als mer noh vier Daach endlich ahnkohme
Su stolz wie dausend Mann
Denn do ahm andre Ufer fing
Tatsächlich Asien ahn
Ich weiß nit, ob mir zwei uns jemohls
Irjendjet jeschwooren hann
Vermutlich nit, do daachte mir
Vüür lauter Sehnsucht janit draan
Ich wünsch mir, dat wenn eines naahx
En Stäänschnupp rungerfällt
Dir dann dat enfällt, wat du wirklich wünschs
Un du't dann eisern für dich selvs behällts
Denn du bess nit dä, dä du sinn wollts
Am Bosporus in Istanbul
Un dinge Ausverkauf dä mäht dich alles
Bloß nit wirklich fruh
Woröm häss du ding Seel verkauf
Un wat joov et dofür?
Belüsch doch wä du wills
Verzäll et bloß nit mir