S Katzerl is davo! (Lustiges bayerisches Kinderlied über Katzen)

Frau Braun vom zwoaten Stock
Rennt durchs Haus im Morgenrock
Runter, rauf im Dauerlauf
Vom Keller bis zum Speicher nauf

Wo is bloß mei Mieze-Katzerl?
Wo is bloß mei Mimi-Schatzerl?
Fragts an jeda Tür
Seit siebne in da Früah!

Ja, was? Ja, wia? Ja, wo?
‘S Katzerl is davo!
Ja, was? Ja, wia? Ja, wo?
Alle wissens scho!
Doch was koana wissen ko:
Im Schrank von da Frau Braun
Do hört ma was, do hört ma …
Do hört ma was Miaun

Scho rennts im Morgenmantl
Glei zum Bäcker Brandl
Habts Ihr net mei Mimi gseng?
Do sogt de Bäckerin fei streng:

Nanananana!

Mir verkaafa Sahnekuacha
Katzerl ham do nix zum Suacha
Daatn d‘Sahne obaschlecka
Kam da Bäcka glei mim Stecka

Ohohohoh!

Ja, was? Ja, wia? Ja, wo?
‘S Katzerl is davo!
Ja, was? Ja, wia? Ja, wo?
Alle wissens scho!
Doch was koana wissen ko:
Im Schrank von da Frau Braun
Do hört ma was, do hört ma …
Do hört ma was Miaun

Dann rennt s‘ im Morgenmantl
Glei zum Metzger Grantl
A Katz! De daat ma grad no fehln
Daat ma bloß de Würschtl stehln

Grrrrr...

Dazua knurrt im Hintagrund
Da dicke, böse Metzgahund
Und scho rennt d‘Frau Braun davo
I glaab, mei Katz is anderswo

Jajajajajaja!

Ja, was? Ja, wia? Ja, wo?
‘S Katzerl is davo!
Ja, was? Ja, wia? Ja, wo?
Alle wissens scho!
Doch was koana wissen ko:
Im Schrank von da Frau Braun
Do hört ma was, do hört ma …
Do hört ma was Miaun

Dann rennt sie nei zur Polizei
De sogn erst: Des hamma glei
Doch dann wissens net
Wias Katznfanga geht

Weida zum Herrn Pfarra nacha
Doch der konn do aa nix macha
‘S gangat bloß, des is scho klar
Wann de Katz katholisch waar

Ja, was? Ja, wia? Ja, wo?
‘S Katzerl is davo!
Ja, was? Ja, wia? Ja, wo?
Alle wissens scho!
Doch was koana wissen ko:
Im Schrank von da Frau Braun
Do hört ma was, do hört ma …
Do hört ma was Miaun

Erst auf d‘Nacht kommt sie nach Haus
Ziagt an Morgenmantl aus
Geht zum Kleiderschrank und do:
Mei, de Mimi! Bin i froh!

Mimi! Mei Mimi! Miau ...

Doch wer liegt do no dabei?
Kloane Katzerl, siebne glei
Frau Braun muass bissi woana
Mimi-Mama schleckt de Kloana

Ja, was? Ja, wia? Ja, wo?
‘S Katzerl is scho do!
Ja, was? Ja, wia? Ja, wo?
Alle wissens scho!
Mei, do samma aber froh
Im Schrank von da Frau Braun
Do gibts jetz was, do gibts jetz …
Do gibts jetz was zum Schaun