COLA

Avò avò avò
ora veni lu patri to’
chi partiu pi lu mari
senza, ’i fattu, cchiù turnari
e ti porta a vucca sicca
fami, siti picca a picca
e ti porta l’occhi ranni
comu li pisci ’n menzu all’unni
Avò avò avò
ninna nanna ninna oh
ora veni lu piscaturi
grira, canta, fa rumuru
jetta ’a rizza pi buscari
custateddi e sparagghiuni
e ti vidi assummari
e, p’u scantu, cangia culuri
Avò avò avò
’a svintura di mamma to’
ca sognava di fuiri
’i ’stu paisi angariatu
e nascisti comu fera
da mmucciari a lu mircatu
Cola pisci pisci Cola
Cola pisci cala cala
cala Cola Cola nesci
e sutta lu mari crisci
Avò avò avò
e lu juncu si calò
pi lu Re cerimuniusu
ti carizza e ti cumanna
d’a spiranza faci usu
e pi crisima t’abbudda
la curuna di lu regnu
e sintenzia nta la fudda
«Arripara ’sta culonna»
comu chiddu chi la curpa
’un lu poti mai tuccari
e ti varda gran facceri
canuscennu ’u siminatu
ammucciannu li so’ risa
nta ’nu chiantu disperatu
Cola pisci pisci Cola
Cola pisci cala cala
cala Cola Cola brisci
e cu la curuna nesci
E tu nesci pi daveru
dopu ’na simana bona
la curuna ’ntra li manu
arrancannu mischineddu
ciatu ruttu e un pinseru:
c’a virgogna di la mamma
pi la cira di stu figghiu
sciddicassi finalmenti
comu ’u scuru nto risbigghiu
Ma li pedi chi talii
petri petri arrivannu
non su’ chiddi disiati
dopu ’stu mazzamareddu
È lu Re chi, sbarruatu
pigghia ’i prescia la curuna
tra li plausi di li genti
ca t’abbuffuniava antura
Cola pisci lu valenti!
Pisci Cola ’u sarbaturi!
Abbannia tutta la genti
siddiannu Re e baruni
Avò avò avò
lu suvranu ti buciò
«Ahi lu russu è pirdutu,
è sbinnata ’a truvatura!»
Scippa ’a petra ammucciuni
quinni susa la curuna
Lu capizzu ora è cunzatu
’ntra lu funnu di lu mari
vai capennu la sunata
senti ’u cori to’ siccari
Scinni attorna pisciteddu
lu paisi varda e ’nghiutti
scinni e gira sulu quannu
’sta culonna ’a pigghianu tutti