يا بنيتي [Original]

يا بنيتـــــــــي ما عاد طير الهوى طير
قص الزمــــــــان من الجناح وطرحنا
غاب القمــــــــــر عنا وجانا قمر غير
ما هوب لنــــــــــا نوره ولا به فرحنا
من اولٍ والبال مـــــــــــــــا فيه تعكير
والقلـــــــــب خالي والولع ما فضحنا
كنا بليل اهـــــــــــل الصبابة مسـاهير
كم قمرةٍ نادت عليــــــــــــــــنا ورحنا

ويا ما قطعنا للمـــــــــــــلاقا مشـاوير
ويا ما على شاطــــــي المحبة سبحنا
ويا ما لقينـــــــــا من زيون وغناديـر
ويا ما جــــــــرحنا بالهوى وانجرحنا
واليوم شبنا مــــــــــــن كثير التفاكير
ولا عاد للسكـــــــــــــر طعم في بلحنا
وقلنا لوقتٍ فـــــــات تصبح على خير
وارتاح منـــــــــــــــا وقتنا واسترحنا

يا بنيتي يا عندنـــــــــــــــا من تعابيـر
ولولا البــياض اللي على الراس بحنا
يشعل عروق القلــــب شدو العصافيـر
وسهم العيـــــــــون اليا رمانا طرحنـا
يابوي انــــــــــا مثلك انا توي صغــير
والنفـــــــــس خضرا وتونا في فرحنا
كبرت لاكــــــــــــن داخلي طفلٍ صغيـر
ولو يفهمون احســـــــاسنا ما شرحنا