N'accordo In Fa

Tenevo na paciona 'e 'nnammurata,
affezionata, semplice e gentile...
Doppo tre anne, 'a capa ll'è avutata,
e ll'è venuto 'o sfizio 'e mme lassá...
Stó' contro a tutt''e ffemmene
pe' chesta 'nfamitá...
E na vendetta nera voglio fá:
Mm'ho comprato nu mandulino
e mme metto for''o balcone...
Quanno passa na signurina
io lle faccio n'accordo in "Fa"...
Po' lle canto chistu sturnello
ch'è capace d''a 'ntussecá:
Fli-ppó...fli-ppó...
fli-ppó...fli-ppó...
Fiore di primavera...
La donna tiene i peli sopra il cuore,
e io nun mm''a pigliasse pe' mugliera
nemmeno se me l'ordina il dottore...
Parola mia,
parola mia d'onore...
Diceva: "Tu si' tutt''o core mio
e si mme lasse tengo il vetriuolo!"
Po' mme guardava 'mmocca pe' gulío...
a n'atu mese avévam''a spusá...
Nèh chella 'o juorno quínnece mme dice chesto a me,
'o sídece...nun se fá cchiù vedé!
E pe' chesto, cu 'o mandulino,
io mme metto for''o balcone,
quanno passano 'e ssignurine
lle cumbino n'accordo in "Fa"...
Po' lle canto chistu sturnello
ch'è capace d''e 'ntussecá:
Fli-ppó...fli-ppó...
fli-ppó...fli-ppó...
Fiore di primavera...
La donna dice: "Una capanna e un cuore..."
ma quanno vede 'e ccarte 'e mille lire,
se mette pure cu nu scupatore...
Parola mia,
parola mia d'onore!...
Succede, che mm'accatto nu giurnale,
e trovo scritto: "Rosa Imperatore,
oggi si sposa con...il tal dei tali..."
E' chillo 'o juorno ca mm'aggi''a spassá...
Faccio na cosa semplice
ca ll'ha da fá svení...
Dice: Ma che lle faje? Mo v''o ddich'i'!
Mme ne jèsco cu 'o mandulino
e mme metto sott''o purtone...
quanno arrivano gli sposini,
io lle faccio n'accordo in "Fa"...
Po' lle canto chistu sturnello
ch'è capace d''e ffá schiattá:
Fli-ppó...fli-ppó...
fli-ppó...fli-ppó...
Fiore di primavera...
Chist'è nu matrimonio per amore,
ma tu, mio caro sposo, sta' sicuro
che a San Martino vaje a fá 'o priore...
Parola mia,
parola mia d'onore...