Marechiare
Salvatore Di Giacomo
Quanno sponta la luna a Marechiare
Pure li pisce 'nce fanno a ll'ammore
Se revotano ll'onne de lu mare
Pe la priezza cagnano culore
Quanno sponta la luna a Marechiare
A Marechiare ce sta na fenesta
'A passiona mia ce tuzzuléa
Nu garofano addora 'int'a na testa
Passa ll'acqua pe' sotto e murmulea
A Marechiare ce sta na fenesta
Chi dice ca li stelle so' lucente
Nun sape 'st'uocchie ca tu tiene 'nfronte
'Sti ddoje stelle li ssaccio je sulamente
Dint'a lu core ne tengo li pponte
Chi dice ca li stelle so' lucente?
Scétate, Carulí, ca ll'aria è doce
Quanno maje tantu tiempo aggi'aspettato?
P'accumpagná li suone cu la voce
Stasera 'na chitarra aggio purtato
Scetate, Carulí, ca ll'aria è doce